Gen 13 | SP | STEP | ויעל אברם ממצרים הוא ואשתו וכל אשר לו ולוט עמו הנגבה

Genesis 13

1 ויעל אברם ממצרים הוא ואשתו וכל אשר לו ולוט עמו הנגבה 2 ואברם כבד מאד במקנה בכסף ובזהב 3 וילך למסעיו מנגב ועד בית אל עד המקום אשר היה שם אהלו בתחלה בין בית אל ובין העי 4 אל מקום המזבח אשר עשה שם בראישונה ויקרא שם אברם בשם יהוה 5 וגם ללוט ההלך את אברם היה צאן ובקר ואהלים 6 ולא נשאה אתם הארץ לשבת יחדו כי היה רכושם רב ולא יכלו לשבת יחדו 7 ויהי ריב בין רעי מקנה אברם ובין רעי מקנה לוט והכנעני והפרזי אז ישבים בארץ 8 ויאמר אברם אל לוט אל נא תהיה מריבה ביני ובינך ובין רעי ובין רעיך כי אנשים אחים אנחנו 9 הלוא כל הארץ לפניך הפרד נא מעלי אם השמאלה והימינה ואם הימינה והשמאלה 10 וישא לוט את עיניו וירא את כל ככר הירדן כי כלו משקה לפני שחת יהוה את סדם ואת עמרה כגן יהוה כארץ מצרים באכה צערה 11 ויבחר לו לוט את כל ככר הירדן ויסע לוט מקדם ויפרדו איש מעל אחיו 12 אברם ישב בארץ כנען ולוט ישב בערי הככר ויאהל עד סדם 13 ואנשי סדם רעים וחטאים ליהוה מאד 14 ויהוה אמר אל אברם אחר הפרד לוט מעמו שא נא עיניך וראה מן המקום אשר אתה שם צפונה ונגבה וקדמה וימה 15 כי את כל הארץ אשר אתה ראה לך אתננה ולזרעך עד עולם 16 ושמתי את זרעך כעפר הארץ אשר אם יוכל איש למנות את עפר הארץ גם זרעך ימנה 17 קום התהלך בארץ לארכה ולרחבה כי לך אתננה 18 ויאהל אברם ויבא וישב באלוני ממרא אשר בחברון ויבן שם מזבח ליהוה